श्री आनंदनाथ महाराजकृत अभंग आणि एकारती

॥ श्री गणेशाय नमः ॥ ॐ द्रां दत्तात्रेयाय नमः ॥

॥ श्री स्वामी समर्थ जय जय स्वामी समर्थ ॥

॥ श्री आनंदनाथ महाराजाय नमः ॥

अभंग

आधी नमूं तुमच्या पायां । भक्तवत्सल स्वामिराया ॥१॥ तूंचि माझा बुद्धिदाता । शरण शरण हो समर्था ॥२॥ चौदा विद्यांच्या दातारा । शिरीं ठेवा अभय करा ॥३॥ चौसष्ट कळांचा हा रंग । तुझ्या पायींचा सुरंग ॥४॥ आनंद म्हणे आदि अंत । आम्ही नमिला समर्थ ॥५॥

देह रंग रंगुनि जावा । ठायीं ठायीं स्वामी पाहावा ॥१॥ हीच भक्तिची कसोटी । खरी राखा रे लंगोटी ॥२॥ कैंची संचिताची जोडी । धन वेंची कवडी कवडी ॥३॥ आनंद म्हणे बंड झाले । भक्तीविणें नरका गेले ॥४॥

धन्य अक्कलकोट, धन्य ही बा पेठ । सत्य भुवैकुंठ देखीयले ॥१॥ सुंदर देऊळ समर्थाचे जाण । शोभा ही बा पूर्ण आणीतसे ॥२॥ काय वानूं आतां तेथिल हें भाग्य । मुक्ति लागे वेगें पायरीसी ॥३॥ जोडोनिया कर देव लोटांगणी । लोळती चरणी समर्थाच्या ॥४॥ आनंद म्हणे ऐसे पूर्ण परब्रह्म । अक्कलकोटी वर्म राहीलेंसे ॥५॥ एकारती  प्रेमभावे श्रीगुरुपायी एकारती करूं । अनंत ब्रह्मे रोमी त्यासी कैसे हो धरूं ॥१॥  सर्व ठाव भाव पायीं ओवाळीला । एकारतीचे ध्यान प्रभु ओवाळूं तुजला ॥२॥  तनमन अवघें एकत्र केलें। निजानंद भावें तुजला हो भुलवीलें ॥३॥  सोहं शब्द स्वरूपी समरूप झालों । निजानंदी आनंद रूपासीं मिळलों ॥४॥

॥ श्री स्वामी समर्थ जय जय स्वामी समर्थ ॥