स्तंभी प्रकटला नरहरी हो...

॥ ॐ श्री गणेशाय नमः ॥ ॐ द्रां दत्तात्रेयाय नमः ॥

॥ ॐ श्री नृसिंहाय नमः ॥

साधारण दोनशे-अडीचशे वर्षांपूर्वी पंढरपूर येथें प्रल्हाद शिवाजी बडवे नामक एक थोर संतकवी होऊन गेले. प्रल्हादकवि म्हणून विख्यात असलेले हे संतकवी उत्तम कीर्तन करीत असत. ते श्रीहरी विठ्ठलाचे परमभक्त होते आणि स्वतः पांडुरंग त्यांच्याबरोबर बोलत असे. त्यांची अनेक पदें प्रसिद्ध आहेत.

त्यांपैकी हे एक पद - श्रीनृसिंह अवतार वर्णन करणारे. आज खास श्री नृसिंह जयंतीनिमित्त देत आहोत.

  स्तंभीं प्रकटला नरहरी हो ॥ गडगड गडगड गर्जत घोषें धोकें काळ थरारी हो ॥धृ.॥ कडकड स्तंभ कडाडित नादें गडगड गगन विदारी हो ।  घडघड रविरथ विघडत गगनीं तडतड धरणि तडाडी हो ॥१॥  कराळमुख सिंहाचें दाढा विक्राळा व्यंकटा हो । पिंगट वर्ण जटा सुभटा करिं नखपंक्ती अति तिखटा हो ॥२॥  धडधड धडधड धडकत नेत्रीं अग्नीचे कल्लोळ हो । सळसळ सळसळ वदनि सळाळी विशाळु जिव्हा लोळे हो ॥३॥  जानूवरि हरि धरि दनुजाधिप रागें उदर विदारी हो ।  काढुनि अरिउदरांतुनि अंत्रे घाली निजकंधरी हो ॥४॥  घटघट घोंटित रक्त कंठिचें वाटे काळ भुकेला हो ।  वृत्तवृकापति दिक्पति म्हणती मोठा प्रळय उदेला हो ॥५॥ सुरवर सुमनें वर्षति हर्षें गर्जति जयजयकारी हो ।  स्तविती नरकिंकर विद्याधर प्रल्हादकैवारी हो ॥६॥

॥ श्रीगुरुदेवदत्त ॥