आरती दत्तगुरूंची - श्री गुरु दत्तराज मूर्ती

॥ श्री गणेशाय नम: ॥ ॐ द्रां दत्तात्रेयाय नमः ॥ 

श्री गुरु दत्तराज मूर्ती ओवाळीतो प्रेमे आरती ॥धृ.॥

ब्रह्मा विष्णू शंकराचा, असे अवतार श्री गुरुचा

कराया उद्धार जगाचा, जाहला बाळ अत्रीऋषीचा

धरीला वेष असे यतीचा, मस्तकी मुगुट शोभे जटेचा

कंठी रुद्राक्ष माळ धरुनी, हातामधे आयुधे बहुत भरूनी ,

तेणे भक्तांचे क्लेश हरूनी, त्यासी करूनी नमन

अघशमन होईल रिपुदमन, गमन असे त्रैलोक्यावरती

ओवाळीतो प्रेमे आरती, श्री गुरु दत्तराज मूर्ती... ॥१॥

गाणगापुरी वस्ती ज्याची, प्रीती औदुंबर छायेसी

भीमा अमर संगमाची, भक्ती असे बहूत सुशिष्यांची

वाट दावूनीया योगाची, ठेव देत असे निज मुक्तीची

काशी क्षेत्री स्नान करितो, करविरी भिक्षेला जातो

माहुरी निद्रेला वरीतो, तरतरीत छाटी, झरझरित

नेत्र, गरगरित शोभतो त्रिशुळ जया हाती

ओवाळीतो प्रेमे आरती, श्री गुरु दत्तराज मूर्ती... ॥२॥

अवधुत स्वामी सुखानंदा, ओवाळीतो सौख्यकंदा

तारी हा दास हृदयकंदा, सोडवी विषय मोहछंदा

आलो शरण अत्रीनंदा, दावी सद्गुरु ब्रह्मानंदा

चुकवी चौऱ्यांशीचा फेरा, घालीती षडरिपू मज घेरा

गांजीती पुत्र पौत्र दारा, वदवी भजन मुखी, तव

पूजन करीत असे सुजन जयांचे बलवंतावरती 

ओवाळीतो प्रेमे आरती, श्री गुरु दत्तराज मूर्ती... ॥३॥