॥ श्री स्वामी समर्थाष्टक ॥

॥ ॐ श्री गणेशाय नमः ॥ ॐ द्रां दत्तात्रेयाय नमः ॥

असें पातकी दीन मीं स्वामी राया l पदी पातलो सिद्ध व्हा उद्धराया ll नसे अन्य त्राता जगी या दीनाला l समर्थां तुझ्यावीण प्रार्थू कुणाला ॥१॥ मला माय न बाप न आप्त बंधू l सखा सोयरा सर्व तू दीन बंधू ll तुझा मात्र आधार या लेकराला l समर्था तुझ्यावीण प्रार्थू कुणाला ॥२॥ नसे शास्त्र विद्या कलादीक काही l नसे ज्ञान, वैराग्य ते सर्वथा ही ll तुझे लेकरु ही अहंता मनाला l समर्था तुझ्यावीण प्रार्थू कुणाला ॥३॥ प्रपंची पुरा बद्ध झालो दयाळा l तुझा दास मी ही स्मृती ना मनाला ll क्षमेची असे याचना त्वत्पदाला l समर्था तुझ्यावीण प्रार्थू कुणाला ॥४॥ मला काम क्रोधाधिकी जागविले l म्हणोनी समर्था तुला जागविले ll नका दूर लोटू तुझ्या सेवकाला l समर्था तुझ्यावीण प्रार्थू कुणाला ॥५॥ नको अंत पाहू त्वरे धाव घेई l तुझ्यावीण नाही दुजी श्रेष्ठ आई ll अनाथासि आधार तुझा दयाळा l समर्था तुझ्यावीण प्रार्थू कुणाला ॥६॥ कधी गोड वाणी न येई मुखाला l कधी द्रव्य ना अर्पिले याचकाला ll कधी मुर्ती तुझी न ये लोचनाला l समर्था तुझ्यावीण प्रार्थू कुणाला ॥७॥ मला एवढी घाल भिक्षा समर्था l मुखे नित्य गावी तुझी गुण गाथा ll घडो पाद सेवा तुझ्या किंकराला l समर्था तुझ्यावीण प्रार्थू कुणाला ॥८॥ ॥श्री स्वामी समर्थार्पणमस्तु ॥

॥ श्रीदत्तात्रेयार्पणमस्तु ॥ ॥ श्री गुरुदेव दत्त ॥