॥ श्री गणेशाय नमः ॥ ॐ द्रां दत्तात्रेयाय नमः ॥
कृपा असू दे या दासावर । सद्गुरु वासुदेवानंद ॥धृ.॥
तव नामाच्या जयघोषाने लाभे आत्मानंद । सद्गुरु वासुदेवानंद ॥
धन्य झाले श्री टेंब्ये कुल । माणगांव हे अति पुण्यस्थल ॥१॥
तिथे जन्मुनी पसरविलास तू । आपुला किर्ती सुगंध । सद्गुरु वासुदेवानंद ॥
मानवदेही जणु परमेश्वर । अवतरलासी या भूमीवर ॥२॥
भक्तांच्या हृदयात रुजविला । आत्मोन्नतीचा कंद । सद्गुरु वासुदेवानंद ॥
तुझे आचरण, दिव्य तपोबल । त्यागी जीवन, चरित्र उज्ज्वल ॥३॥
श्रवणीं पडता जग मायेचे । तुटोनी जाती बंध । सद्गुरु वासुदेवानंद ॥
साहित्याची करुनी सेवा । उद्धरण्यास्तव मानवजीवा ॥४॥
प्रदान केला, निज ग्रंथातुनी । आध्यात्मिक मकरंद । सद्गुरु वासुदेवानंद ॥
सुबोध त्यातील अमृतवचनें । जागृत करीती आत्मलोचनें ॥५॥
पढता पढता ज्ञानी बनले । कितीक तरी मतीमंद । सद्गुरु वासुदेवानंद ॥
गरुडेश्वरचा अगाध महिमा । मांगल्याची जिथे पौर्णिमा ॥६॥
तुझ्या दर्शने पावन होत । भाविक भक्तजनवृंद । सद्गुरु वासुदेवानंद ॥
नामस्मरणीं चित्त जडावे । जीवा-शिवाचे ऐक्य घडावे ॥७॥
सहज सुटावा संसारातील । आसक्तीचा छंद । सद्गुरु वासुदेवानंद ॥
मी अज्ञानी अनाथ म्हणूनी । हीच प्रार्थना करितो चरणीं ॥८॥
कृपा ओघ तव माझ्यावरचा । कधी न व्हावा बंद । सद्गुरु वासुदेवानंद ॥
॥ नमो गुरवे वासुदेवाय ॥
॥ श्री गुरुदेव दत्त ॥
॥ दिगंबरा दिगंबरा श्रीपाद वल्लभ दिगंबरा ॥