या अखंड चराचराला व्यापून टाकणारा तो सर्वशक्तिमान परमात्मा या जगताच्या कल्याणासाठीच विविध रूपें धारण करतो. आपल्या परमभक्तांच्या उद्धारासाठी, मुमुक्षु जनांना सत्पथी लावण्यासाठीच त्याच्या या सर्व लीला असतात. कधी कधी तो निर्गुण, निराकार परमात्मा सगुण, साकार होऊन संतरूपांत अवतरित होतो आणि सर्वांनाच त्याच्या या सगुणरुपाचा ध्यास लागतो. हे संत-महात्मे असंख्य बद्ध, मुमुक्षु जनांवर कृपा करत त्यांचे जीवन कृतार्थ करतात. अशा साक्षात् परब्रह्मस्वरुप संतांमध्ये शेगावनिवासी संतशिरोमणी श्री गजानन महाराजांचे स्थान अनन्यसाधारण आहे.
आपल्या अवतारकाळांत श्रीगजानन स्वामींनी असंख्य भक्तांवर कृपानुग्रह केला, आणि आजही ‘ देहांताच्या नंतरहि । कितीजणा अनुभव येई ॥' अशी प्रचिती कित्येक गजाननभक्तांना येत आहे. अर्थात ' सदाचाररत सद्‌भक्ता । फळ लाभे बघता बघता ॥' हे मात्र भाविकांनी अवश्य लक्षांत ठेवावे.
या ब्रह्माण्डनायकाचा मालामंत्रही प्रभावी असून, त्याचे श्रद्धापूर्वक पठण केल्यास भाविकांना तात्काळ श्रीगजाननकृपेची अनुभूती येते. ॐ इदं विष्णुर्विचक्रमे त्रेधा निदधे पदम् । समूळ्हमस्य पांसुरे ॥ भावार्थ : ऋषि दयानन्द यांनी या ऋचाचा अर्थ थोडक्यांत असा सांगितला आहे, “यो वेवेष्टि व्याप्नोति चराचरं जगत् स विष्णु:” अर्थात् या चराचर जगतामध्ये जो विद्यमान, व्यापक परमात्मा आहे, तोच हा श्रीहरी विष्णु आहे. त्रीणि पदा विचक्रमे विष्णुर्गोपा अदाभ्यः । अतो धर्माणि धारयन् ॥ भावार्थ : त्या वामन बटूरूपी श्रीहरी परमात्म्यानेच आकाशातील त्रिपादव्याप्त स्थानांत त्रैलोक्य निर्माण केले आणि तिथे तो धर्मरूपाने सर्वदा स्थित आहे. तद्‌विष्णोः परमं पदं सदा पश्यंति सूरयः । दिवीव चक्षुराततम् ॥ भावार्थ : ज्याप्रमाणे आपण सामान्य चक्षूंनी आकाशातील सूर्यनारायण प्रत्यक्ष पाहू शकतो, त्याचप्रमाणे ऋषीमुनी-योगीजन-संत-महात्मे त्यांच्या दिव्य ज्ञानचक्षूंनी श्रीविष्णूंच्या श्रेष्ठस्थानास सहज पाहू शकतात अर्थात परमेश्वराच्या चरणीं म्हणजेच परमपदांस प्राप्त होतात. ॐ नमो भगवते गजाननाय दर्शनमात्रदुःखदहनाय विदेहदेहदिगम्बराय आनंदकंदसच्चिदानंदाय परमहंसाय अवधूताय मनोवांच्छितफलप्रदाय अयोनिसंभवमहासिद्धाय ॥ "गण गण गणात बोते” महामंत्राय । सर्वमंत्रयंत्रतंत्रस्वरुपाय । सर्वसम्पुटपल्लवस्वरुपाय । ॐ नमो महापुरुषाय स्वाहा ( नमः ) ॥
No comments:
Post a Comment