तुझ्या कांतिसम...

॥ ॐ श्री गणेशाय नमः ॥ ॐ द्रां दत्तात्रेयाय नमः ॥ 

तुझ्या कांतिसम, रक्तपताका पूर्वदिशी फडकती । अरुण उगवला, प्रभात झाली, ऊठ महागणपती ॥धृ.॥

सूर्याआधी दर्शन घ्यावें, तुझे मूषकध्वजा । शुभद सुमंगल सर्वांआधी तुझी पाद्यपूजा । छेडुनी वीणा, जागविते तुज सरस्वती भगवती ॥१॥ आवडती तुज म्हणुनि आणिली रक्तवर्ण कमळे । पाचमण्याच्या किरणांसम ही हिरवी दुर्वादळे । उभ्या ठाकल्या, चौदा विद्या घेउनिया आरती ॥२॥ शूर्पकर्णका, ऊठ गजमुखा, उठी रे मोरेश्वरा । तिन्ही जगांचा तूच नियंता, विश्वासी आसरा । तुझ्या दर्शना अधीर देवा हर, ब्रह्मा, श्रीपती ॥३॥