न चित्त कधीही चळों, नच कधी निराशा कळों I
समर्थ जय जय समर्थ जपता दिलासा मिळों II
विशुद्ध मन राहू दे सतत या उभ्या जीवनी I
समर्थ जय जय समर्थ जप हा वसो तन-मनीं II
न रोग-व्याधी जडो न च पिशाच्चबाधा जडो I
न घात अपघात हो सकळ दुर्मतीही झडों II
किती जडविल्या मना विषय वासना अंत ना I
समर्थ जय जय समर्थ जपता उरे अल्प ना II
झणी उसळतो किती राग हा पहा अंतरी I
समर्थ जय जय समर्थ जपतां विझे लवकरी II
सुटे नच तुटे कधी सतत वाढतां लोभ हा I
समर्थ जय जय समर्थ जपतां विरे हा पहा II
सदैव मी आंधळा मजसि मोह ग्रासें पुरा I
समर्थ जय जय समर्थ जपतां निरासे पुरा II
मदांध गज मी जणू उधळितो बळें जीवनी I
समर्थ जय जय समर्थ जपतां शांत हो मनी II
तुडुंब मन हे भरे मत्सरे विनाकारणे I
समर्थ जय जय समर्थ जपतां पडे त्या उणें II
असे षडरिपू मला छळती पोळती अंतरी I
समर्थ जय जय समर्थ जपतां शमती सत्वरी II
रचनाकार - श्रीयुत् नागेश करंबेळकर
No comments:
Post a Comment